الكل يعرف برنامج perfect house wife ، هالبرنامج فادني من جملة وحدة بس.
" خصصي لكل شيء مكان خاص به".
وفعلا اتبعت النصيحه ، صرت اجمع الاشياء المتشابهه مع بعض، واي شيء ماله مكان افكر واطلع له
مرجع ومكان خاص فيه....زمان لا جيت ارتب اوصل لاشياء مدري وين احطهم.... ومن الياس والكسل
كانت اغراضي مالها الا 4 اماكن تحضنهم:
الكرسي – السرير – التسريحه – الارض
- غالبا ملابسي اصفهم عل الكرسي اذا كنت مستعجله لين تصير جبل بعدين اشيلهم.
- سريري المسكين ياما تحمل الضربات الي تجيه، ارمي كتبي، اكياس، عباتي، ملابسي، كل شيء بحكم
ان مساحته كبيره وتغريني اني ارمي عليها الاغراض ونا مستعجله بطلع.
- التسريحه وياعذاب هالتسريحه اللي الشباصات والبكل وعدة الاستشوار والماكياج كله مرمي على ظهرها.
- حتى ارضية غرفتي غارت من البقيه، ومابغيت اقهرها واحسسها ان مالها دور، فكنت أرمي جزمي هنا وهناك
مع شوية اكياس مرميه ، عشان يتوازن منظر الاكوام في كل جهه والا انقلبت غرفتي راسا على عقب.
ومع الوقت، لما ارتب دولابي (طبعا في السنه حسنه) لاحظت بلايز ماعمري لبستها لاني اصلا ماعمري شفتها من كثر
الكركبه الي في الدولاب.... ولما ابي ورقه معينه او فاتورة ، اقعد ساعه عشان احصلها....... فقلت يابنت لازم ترتبين
غرفتك عشان يسهل عليك البحث عن كل شيء تبينه.......... والي حمسني اكثر برنامج بيرفيكت هاوس وايف وجملتها الشهيره
اعلاه.......... فقررت ان أشن حملة هوجاء على الكسل الذي تملكني وعلى خرابة غرفتي. فقريت شوي عن التنظيم وبديت
حملتي والان وصلت لمستوى متقدم افضل من قبل بكثير........ لكن مازلت احتاج طرق افضل واسهل للتنظيم والترتيب.
الإثنين أغسطس 16, 2010 8:06 am